अब्रुनुकसानीच्या खटल्यात संजय राऊत दोषी, १५ दिवसांच्या तुरुंगवासाची शिक्षा

 संजय राऊत अब्रूनुकसानीच्या खटल्यात दोषी, १५ दिवसांची कैद, मेधा किरीट सोमय्या दावा जिंकल्या

मुंबई :  खासदार संजय राऊत यांना अब्रुनुकसानीच्या खटल्यात दोषी ठरवण्यात आले आहे. राऊत यांना १५ दिवसांची कैद सुनावण्यात आली आहे. याशिवाय २५ हजार रुपयांचा दंडही सुनावण्यात आला आहे. शिवडीच्या शहर दंडाधिकाऱ्यांनी निकाल सुनावला. २०२२ मध्ये शौचालय घोटाळ्याचा आरोप करणाऱ्या संजय राऊत यांच्याविरोधात भाजपचे माजी खासदार किरीट सोमय्या यांच्या पत्नी मेधा सोमय्या यांनी अब्रुनुकसानीचा दावा दाखल केला होता. संजय राऊत यांनी कोर्टात जामीन अर्ज केल्यावर त्यांचा जमीन मंजूर झाला असून त्यांना अपील करण्यास तीस दिवसांची मुदत दिली आहे.
मिरा भाईंदर शहरात एकूण १५४ सार्वजनिक शौचालये बांधण्यात आली होती. त्यातील १६ शौचालयं बांधण्याचं काँट्रॅक्ट भाजप नेते आणि माजी खासदार किरीट सोमय्या यांच्या पत्नी मेधा सोमय्या यांच्या युवक प्रतिष्ठानला मिळालं होतं. बनावट कागदपत्रे सादर करुन, मीरा-भाईंदर महापालिकेच्या अधिकाऱ्यांची फसवणूक केली. तसेच साडेतीन कोटींपेक्षा अधिक रुपयांची शौचालयाची बिलेही घेतल्याचा आरोप त्यांच्यावर संजय राऊत यांनी केला होता.पर्यावरणाचा ऱ्हास झाल्याची कारणं दाखवून शौचालय घोटाळा करण्यात आल्याचं राऊत त्यावेळी म्हणाले होते. त्यावर देवेंद्र फडणवीस यांनी उत्तर देण्याचं आवाहनही राऊतांनी केलं होतं. त्यांना भ्रष्टाचाराची फार कणव आहे, भाजपवाल्यांची राष्ट्रभक्ती फार उचंबळून येत असते, त्यामुळे आम्ही काढणार असणाऱ्या टॉयलेट घोटाळ्यावर फडणवीसांनी बोलावं, असं संजय राऊत त्यावेळी म्हणाले होते.

न्याय व्यवस्थेवरील विश्वास वाढला ; मेधा सोमय्या यांची पहिली प्रतिक्रिया
दरम्यान, न्याय व्यवस्थेवरील विश्वास वाढवल्याची प्रतिक्रिया याचिकाकर्त्या मेधा सोमय्या यांनी निकालानंतर व्यक्त केली होती. माझ्या कुटुंबावर आरोप करत मुलांना टार्गेट केले होते. एक सामान्य शिक्षका जशी लढेल तशी मी लढले. मी कोर्टाच्या निकालावर समाधानी आहे, असे मेधा सोमय्या म्हणाल्या. संजय राऊत यांच्यावर आयपीसीच्या ४९९ कलमाच्या अंतर्गत गुन्हा दाखल करण्यात आला होता.